Befolkning, 1. januar 2015

I takt med den sterke folkeveksten dei siste åra har talet på utanlandske statsborgarar meir enn dobla seg frå 2007. Då var det 238 300 utanlandske statsborgarar som var busette i Noreg. Dei svara til 5,1 prosent av folketalet. Til samanlikning stod 143 300 busette utlendingar for 3,4 prosent av folketalet i 1991. I Oslo runda utanlandske statsborgarar 100 000 i løpet av 2014, og dei 102 000 utlendingane som budde i hovudstaden 1. januar, utgjorde 15,8 prosent av innbyggjarane i kommunen. Utanom Oslo er det fylka Rogaland, Akershus, Buskerud og Finnmark som har den største delen utanlandske statsborgarar sett i høve til folketalet: over 10 prosent i kvart av fylka. Lågast del utanlandske statsborgarar har Nord-Trøndelag med under 6 prosent.

Framleis flest polakkar

Det er framleis polakkane som er den største gruppa utanlandske statsborgarar, og gruppa tel 93 600 busette. Dei andre større gruppene med utanlandske statsborgarskap ved siste årsskiftet var svenske og litauiske statsborgarar med respektive 45 100 og 39 500personar.

31 800 fleire menn enn kvinner

Talet på menn voks med 31 400, og talet på kvinner auka med 25 300 til 2 598 800 menn og 2 567 000 kvinner. Det har budd fleire menn enn kvinner i Noreg sidan 2010. Denne utviklinga ser ut til å fortsette, og per 1. januar 2015 var det eit overskot av menn på 31 800.

Folketalet i Noreg voks med i alt 56 700 i 2014, og innbyggjartalet auka i alle fylka. Størst folketilvekst, både i absolutte tal og prosent, hadde Oslo. I hovudstaden var det 13 200 fleire busette 1. januar 2015 enn på same tid året før. I alt 284 av dei 428 kommunane her i landet hadde vekst i folketalet i løpet av 2014, 138 hadde nedgang i folketalet og 6 kommunar hadde eit folketal på line med førre året.

Flest eldre i Hedmark, færrast i Oslo

Ved siste årsskiftet var 61,6 prosent av dei busette i aldersgruppa 20-66 år, medan 9,7 prosent var i aldersgruppa 67-79 år. Dei aller eldste, som var 80 år og over, utgjorde 4,3 prosent av folkemengda. Sett i høve til folketalet var det Hedmark som hadde flest busettei den eldste gruppa. Deretter kom Sogn og Fjordane og Oppland. Minst var delen i aldersgruppa 80 år og over i Oslo.