Ordreindeks for industri (opphørt), 4. kvartal 1999

Den totale ordrereserven har dei siste kvartala vist ei jamn nedgåande utvikling. Særskilt sterk har reduksjonen i ordrereserve for heimemarknaden vore, med ein nedgang på 33 prosent frå 4. kvartal 1998. Reserve for eksport har gått opp dei to siste kvartala, og motverkar i nokon grad den dårlege utviklinga i heimemarknaden.

Transportmiddel, oljeplattformer og modular

Transportnæringa sin totale ordretilgang gjekk ned med 15 prosent frå 3. til 4. kvartal i fjor. Tilgangen er likevel høgare enn i siste halvdel av 1998 og første halvdel av 1999. Denne auken kjem i hovudsak frå innanlandsmarknaden, og ser ut til å vera fordelt på fleire aktørar i næringa. Total ordrereserve har vore låg men stabil dei tre siste kvartala.

Tilgangen for oljeplattformer og modular har hatt ein verdiauke på 48 prosent frå botnnoteringa i 4. kvartal 1998. Auka tilgang dei to siste kvartala har likevel ikkje vore tilstrekkeleg for ei oppbygging av ordrereservane. Reservane har vore sviktande gjennom heile 1999 og 1998, og ligg no om lag 40 prosent lågare enn i same kvartal året før.

Metallvare, elektroteknisk og optisk industri

Metallvareindustrien og elektroteknisk og optisk industri hadde auke i ordretilgang både frå innanlands- og eksportmarknaden i 4. kvartal 1999. Begge næringane hadde den klart sterkaste auken i tilgang for levering innanlands. Ordrereservane er blitt noko styrkja, men ligg framleis lågare enn i same kvartal i 1998.

Ny metode for utrekning av trend

På grunn av store variasjonar i innrapporterte tilgangstal har dei berekna trendseriane ofte fått store utslag og krappe skift. For å gi ein meir brukarvennleg serie har vi frå og med 4. kvartal 1999 teke i bruk ein ny metode for utrekning. Nye trendtal vil derfor avvike noko frå dei som tidlegare er publiserte. For meir om dette sjå Om statistikken.