Ordreindeks for industri (opphørt), 4. kvartal 2001

Ordretilgangen var ned heile 34 prosent samanlikna med 4. kvartal 2000, men mykje av nedgangen må sjåast i samanheng med at mengda av nye ordrar var uvanleg høg i dette kvartalet. Det var først og fremst eit markert fall i innanlandsk etterspurnad som var ansvarleg for den negative utviklinga. Reviderte data synte at fallet i ordretilgangen for 3. kvartal blei noko mindre enn tidlegare rekna med. Vi fekk dermed berre små endringar i ordretilgangen frå 3. til 4. kvartal 2001. Samla ordrereservar synte negativ utvikling i 4. kvartal 2001, men var framleis berre marginalt lågare enn i same periode i 2000.

Kjemiske råvarer

Etter ein periode med jamn auke i nye ordrar, blei det registrert eit markert fall i 4. kvartal 2001. Samla ordretilgang var om lag 39 prosent lågare enn i same periode i 2000. Næringa rapporterer om moderat vekst i samla ordrereservar.

Metallindustrien

Samla ordretilgang for metallindustrien heldt fram med å falle i 4. kvartal 2001, og det var særleg nedgang i utanlandsk etterspurnad etter ikkje-jernhaldige metall som var årsak til denne utviklinga. Innanlandsk etterspurnad synte ein moderat auke i same tidsrom.

Maskinindustrien

Eit markert fall i tilgangen på nye ordrar blei avløyst av ny vekst i 4. kvartal 2001. Det var hovudsakleg utviklinga i innanlandsk etterspurnad som sto for auken. Ordretilgangen frå eksportmarknaden var heile 22 prosent lågare enn i 4. kvartal 2000.

Oljeplattformer og modular

Næringa rapporterer om positiv utvikling i etterspurnadsforholda, men ordretilgangen var framleis om lag 20 prosent under nivået frå 4. kvartal 2000. Samla ordrereservar synte moderat nedgang gjennom heile 2001, og 4. kvartal utgjorde i så måte ikkje noko unntak.