Ordreindeks for industri (opphørt), 4. kvartal 2007

Samla ordretilgang i industrien gjekk opp 19 prosent frå 4. kvartal 2006 til 4. kvartal 2007 grunna ei klårt positiv utvikling i eksportmarknaden. Ordrereservane hadde ein vekst på 40 prosent i det same tidsrommet. Det var spesielt i næringane maskinindustri, oljeplattformer og modular og kjemikaliar og kjemiske produkt at både ordretilgangen og ordrereservane auka mykje i 2007.

Utviklinga i maskinindustrien hang framleis saman med store enkeltoppdrag hjå nokre enkeltaktørar. Ordretilgangen var 53 prosent høgare i 4. kvartal 2007 enn i det same kvartalet året før. For ordrereservane gav tilsvarande samanlikning ein auke på 57 prosent, og dei har difor vist svært kraftig vekst sidan 2005. Veksten i maskinindustrien er delvis knytt til norsk verksemd der ein stor del av ordremassen skal produserast i utlandet.

Produsentar av oljeplattformer og modular rapporterte i 4. kvartal 2007 om ein ordretilgang som var 48 prosent høgare enn det som vart registrert i 4. kvartal 2006. Ordrereservane viste ein auke på 17 prosent i det same tidsrommet.

Ordretilgangen og ordrereservane i næringa kjemikaliar og kjemiske produkt var svært høge i 4. kvartal 2007. Tilgangen hadde ein vekst på 24 prosent, medan ordrereservane auka med heile 74 prosent samanlikna med 4. kvartal 2006. Ser ein berre på kjemiske råvarer, var auken i tilgangen og reservane på respektive 38 og 92 prosent.

Transportmiddelindustrien sin ordretilgang var 3 prosent lågare i 4. kvartal 2007 enn i 4. kvartal 2006, men var likevel på eit høgt nivå. For ordrereservane kan ein notere ein auke på om lag 47 prosent i den same perioden.

Metallindustrien rapportere om tilnærma uendra ordretilgang i 4. kvartal 2007 samanlikna med 4. kvartal 2006. Ordrereservane var 3 prosent lågare i 4. kvartal 2007 enn i 4. kvartal 2006.

For internasjonale samanlikningar av ordretilgang i industrien viser Statistisk sentralbyrå (SSB) til EUROSTAT (EU).

Tabeller

Tabeller til publiseringen