Fiskeri (avslutta i Statistisk sentralbyrå), 2009, førebelse tal

Det var størst nedgang i fangstane av kolmule og tobis, medan fangstane av lodde, augepål og blåkveite auka.

Det blei fiska 483 000 tonn sild første halvår 2009, om lag det same som i første halvår 2008. Førstehandsverdien auka med 13 prosent, til 1,1 milliardar kroner. Sildefangstane utgjorde 34 prosent av den totale fangstmengda og 20 prosent av den totale førstehandsverdien.

Sterk nedgang i verdi av torskefangst

Sjølv om førstehandsverdien for torskefangsten minka med 33 prosent frå første halvår 2008 til første halvår 2009, heldt torsken posisjonen som viktigaste arten målt i førstehandsverdi. Fangsten var på 157 000 tonn, om lag 3 prosent mindre enn første halvår 2008. For første halvår i år tilsvarar dette 34 prosent av den totale førstehandsverdien og 11 prosent av den totale fangstmengda.

Loddefangsten auka kraftig, frå 40 000 tonn første halvår 2008 til 230 000 tonn første halvår i år, og utgjorde 17 prosent av den totale fangstmengda. Ei årsak til den store auken er at det i 2009 igjen blei tillate med loddefiske i Barentshavet.

Fangsten av kolmule gjekk ned med 45 prosent, til 219 000 tonn, og utgjorde 16 prosent av den totale fangstmengda.

Av den totale fangstmengda gjekk 72 prosent til konsum, medan 28 prosent gjekk til mjøl, olje og anna. Tilnærma all fangst av tobis, 79 prosent av kolmulefangsten og 33 prosent av loddefangsten gjekk til industrien i første halvår 2009.