Harmonisert konsumprisindeks, september 2000

Høgare prisar på elektrisitet, bensin, klede og sko medverka mest til oppgangen i den harmoniserte indeksen frå august til september. Elektrisitetsprisane steig med 2,7 prosent sidan førre månad, medan prisane på klede og sko auka med 5,1 prosent. Etter klar nedgang i bensinprisane førre månad auka prisane på drivstoff og smørjemiddel med 4,4 prosent i september.

Lågast prisvekst i England, Sverige og Tyskland

Den harmoniserte konsumprisindeksen for heile EØS-området viste ingen endring frå juli til august.

Derimot var det ein nedgang i 12-månadersveksten (endring frå same månad året før) frå juli til august frå 2,2 til 2,0 prosent. Landa som inngår i den Europeiske monetære union (EMU), hadde i august ein 12-månadersvekst på 2,3 prosent, mot 2,4 prosent i juli. Sidan august i fjor har England, Sverige og Tyskland hatt lågast prisvekst i EØS-området med respektive 0,6, 1,4 og 1,8 prosent. I England er det prisane på klede og sko og teletenester og teleutstyr som har trekt mest ned. Også i Sverige og Tyskland er det lågare prisar på teletenester og teleutstyr som medverkar til den låge prisveksten. Samla sett i heile EØS-området ser ein også at det er konsumgruppene kommunikasjon og klede og sko som har hatt prisnedgang i denne perioden.

Høgast prisvekst i Irland, på Island og i Luxembourg

Frå august 1999 til august 2000 er det Irland, Island og Luxembourg som har hatt høgast prisvekst med respektive 5,7, 3,9 og 3,7 prosent. I Irland har prisane på utdanning, alkohol og tobakk auka mest medan ein på Island har hatt høgast oppgang i prisane på bustad, lys og brensel. Det er prisane på helsetenester som har stige mest i Luxembourg.

I heile EØS-området har prisane på transport auka mest dei siste 12 månadene, noko som kjem av oppgangen i prisane på råolje.