Prisindeks for førstegangsomsetning innenlands, 15. september 2003

Brennstoff, smørjeoljer og elektrisk straum gjekk samla ned med 3,9 prosent. Eit fall i prisane innanfor olje og oljeprodukt på 6,3 prosent var årsaka til nedgangen denne månaden. I denne gruppa var det råolja som trekte mest ned. Elektrisk straum gjekk òg ned med 1,7 prosent.

Matvarer hadde ein oppgang på 0,4 prosent som motverka nedgangen. Grønsaker og frukt og kjøtt gjekk opp høvesvis 1,2 og 1,0 prosent. Ei årsak til prisoppgangen var lægre tilgang på tomatar og blomkål. Oppgangen på kjøttprisane blei påverka av høgare prisar på tilverka kjøtt. Oppgang i prisar på meieriprodukt gjorde òg sitt.

Elles gjekk prisane på tilverka varer ned 0,3 prosent, mens prisane på kjemiske produkt gjekk opp 0,4 prosent.

På heimemarknaden gjekk prisane ned 0,8 prosent. Prisnedgang på olje og oljeprodukta var også her årsaka til utviklinga.

12-månadersendring: Oppgang på 6,3 prosent

12-månadersendringa for indeksen samla blei 6,3 prosent. Fleirtalet av hovudgruppene synte oppgang i denne perioden. Største oppgang var på produkt innanfor gruppa brennstoff, smørjeolje og elektrisk straum. Oppgangen kjem av høgare straumprisar på nesten 60 prosent.

Matvarer hadde ein prisauke på 1,4 prosent, kor grønsaker og frukt viste ein prisauke på over 10 prosent. Råvarene viste ein prisauke med 4,7 prosent, som kjem av høgare prisar innanfor malmar og avfall av metall på over 14 prosent.

Ein desimal frå januar 2004

Frå og med publiseringa av januar 2004 vil indeksane bli framstilte med ein desimal - i høve til dagens frigjeving med to desimalar. Årsaka til endringa er at to desimalar gjev eit overdrive inntrykk av presisjonen til estimata - som ikkje blir noko dårlegare med ein desimal. I tillegg har vi eit ønskje om å harmonisere med vanleg praksis- som er ein desimal.