Varehandelsindeksen, mai 1999

Mai er ein vanskeleg månad å sesongjustere på grunn av ulike glidande helgedagar. I mai i år var det to handledagar mindre enn i mai i fjor.

Prisindeksen for detaljhandelen auka med 2,3 prosent frå mai 1998 til mai i år.

Butikkar med næringa butikkhandel med apotekvarer, sjukepleieartiklar, kosmetikk og toalettartiklar auka omsetninga frå mai 1998 til mai i år med 2,0 prosent. Salet av andre nye varer gjekk opp med 0,4 prosent i same periode. Denne næringa omfattar mellom anna klede, sko, elektriske varer, møblar, jern- og byggjevarer. Verdien av omsetninga til butikkhandel med nærings- og nytingsmiddel i spesialforretningar gjekk ned med 0,2 prosent. Butikkhandel med breitt vareutval, som i stor grad består av kolonialforretningar, gjekk ned med 0,3 prosent.

Tala byggjer på 4 150 oppgåver som er om lag 350 færre enn det som normalt vil liggje til grunn for publisering av endeleg detaljomsetningsindeks. Datagrunnlaget er ikkje like grundig revidert som det vil vere når den endelege detaljomsetningsindeksen for mai vert publisert den 8. juli.