Opna konkursar, 1. kvartal 2006

I 1. kvartal i år vart det registrert 845 konkursar, 23 prosent færre enn same periode i 2005. 505 av konkursane, eller 60 prosent, var føretakskonkursar, eksklusive enkeltpersonføretak. Ein av tre føretakskonkursar finn vi innanfor varehandel.

Næringane eigedomsdrift, forretningsmessig tenesteyting og utleige, og hotell- og restaurantverksemd er tradisjonelt næringar med mange konkursar. Talet på føretakskonkursar innanfor desse næringane har gått ned med høvesvis 40 og 37,3 prosent frå same periode i fjor.

Også innanfor informasjonssektoren var det totalt sett færre konkursar i 1. kvartal. Medan det i 1. kvartal 2005 i alt var 70 konkursar, låg talet i same periode i år på 58.

40 prosent av føretaka som gjekk konkurs, vart etablerte i 2000 eller tidlegare, medan det var 34 føretak, det vil seie rundt 7 prosent, som ikkje vart stifta før i 2005.

340 av konkursane i årets tre første månader gjeld enkeltpersonføretak, inklusive personlege konkursar. 28 prosent av enkeltpersonføretaka som vart slått konkurs, dreiv innanfor byggje- og anleggsbransjen. Om lag 17 prosent av alle enkeltpersonføretak er innanfor byggje- og anleggsverksemd. Nedgangen i talet på konkursar innanfor jord- og skogbruk og transport og kommunikasjon er på over 40 prosent.

Få kvinner bak konkursar av enkeltpersonføretak

Kvinner stod bak 10 prosent av dei 340 konkursane av enkeltpersonføretak. Talet omfattar også personlege konkursar. Men dei fleste enkeltpersonføretaka, rundt 75 prosent, har ein mannleg innehavar, og desse stod bak ni av ti konkursar.

30 prosent av dei mannlege innehavarane som vart slått konkurs åtte eit enkeltpersonføretak innanfor byggje- og anleggsbransjen. 11 av dei 35 kvinnelege innehavarane som måtte gje opp verksemda si, var etablerte innanfor varehandelen.

Tabeller:

• Tabell 1 Opna konkursar, etter kvartal og fylke. 2005-1. kvartal 2006
• Tabell 2 Opna konkursar, etter månad. 1998-2005 og 1. kvartal 2006
• Tabell 3 Opna konkursar, etter næring. 1. kvartal 2005 og 2006
• Tabell 4 Opna konkursar, omsetning og sysselsette, etter næring. 1. kvartal 2005 og 2006
• Tabell 5 Opna konkursar i varehandel, etter næring. 1. kvartal 2005 og 2006
• Tabell 6 Opna konkursar i varehandel, omsetning og sysselsette, etter næring. 1. kvartal 2005 og 2006
• Tabell 7 Opna konkursar i informasjonssektoren (IKT-sektoren og innhaldssektoren), omsetning og sysselsette, etter næring. 1. kvartal 2005 og 2006
• Tabell 8 Føretakskonkursar ekskl. enkeltpersonføretak, etter etableringsår og fylke. 1. kvartal 2005 og 2006
• Tabell 9 Opna konkursar (AS og ASA), etter fylke og aksjekapital. 1. kvartal 2005 og 2006
• Tabell 10 Opna konkursar, etter fylke og organisasjonsform. 1. kvartal 2005 og 2006
• Tabell 11 Enkeltpersonføretak inkl. personlege konkursar, etter kjønn og fylke. 1. kvartal 2006
• Tabell 12 Enkeltpersonføretak inkl. personlege konkursar, etter kjønn og næring. 1. kvartal 2006