Over 135 000 tapte arbeidsdagar i 2020

I dei sju arbeidskonfliktane i 2020 gjekk totalt 135 768 arbeidsdagar tapt, viser statistikken Fagforeiningsmedlemmer og streikar. Konfliktane involverte til saman 9 377 arbeidstakarar. Av desse var om lag 70 prosent tilsett i næringa transport og lagring, noko som medførte 34 351 tapte arbeidsdagar i denne næringa. Innan næringa forretningsmessig tenesteyting var 2 800 av dei tilsette i konflikt, og næringa stod for omtrent 75 prosent av alle tapte arbeidsdagar.

Det er vanlegvis fleire arbeidskonfliktar og tapte arbeidsdagar i år med hovudoppgjer. Gjennomsnittleg tal på tapte arbeidsdagar for dei ti åra med hovudoppgjer i perioden frå 2000 til 2018 var om lag 219 600, medan det gjennomsnittlege talet på arbeidstakarar involvert var i overkant av 28 000. Samtidig var det i gjennomsnitt nærmare 14 arbeidskonfliktar. 2020 var altså eit år der alle tre indikatorar for omfanget av arbeidskonfliktar var lågare enn normalen.

Lønnsoppgjeret i 2020 vart utsett frå våren til hausten. Dette førte til at meklingane hos Riksmeklaren kom i gang seinare enn normalt, og at enkelte streikar, innanfor nokre av forhandlingsområda, ikkje vart iverksett før i 2021. Desse konfliktane vil først inngå i statistikken for 2021.

For dei arbeidstakarane som var i arbeidskonflikt i 2020, var gjennomsnittleg tal på tapte arbeidsdagar per arbeidstakar omtrent 14,5. Tilsvarande tal for hovudoppgjera i perioden 2000-2018 samla sett var i overkant av 10.

Framleis medlemsauke i hovudsamanslutningane for arbeidstakarar

De fire hovudsamanslutningane for arbeidstakarar, LO, UNIO, YS og Akademikerne, hadde alle ein auke i talet på medlemmer i 2020. Med unntak av YS opplevde alle også ein auke i talet på yrkesaktive medlemmer. Som dei to føregåande åra var auken i absolutte tal størst for LO, med i underkant av 17 700 nye medlemmer, medan Akademikerne igjen hadde den sterkaste prosentvise auken i medlemsmassen, med ein auke på 5 prosent.