944 milliardar kroner betalt inn i 2019

Ved slutten av 2019 utgjer dei samla skatteinnbetalingane 944 milliardar kroner, 67 milliardar meir enn i 2018. Innbetalingane har auka i alle skatteartar. Medan skattane som vert svara av inntekt og formue frå fastlands-Noreg i det store og heile endrar seg gradvis, er skatteinnbetalingane frå petroleumssektoren i større grad avhengige av olje- og gassprisane. Desse kan på kort sikt svinge kraftig og påverke overskotet til oljeselskapa, og i sin tur påverke skattane som vert betalte inn til staten. Skatteinnbetalingane på utvinning av petroleum var i 2019 dei høgaste sidan 2014.

Store delar av skattane vart betalt inn til folketrygda og staten

Medrekna petroleumsskattar gjekk nesten fire femdelar av dei samla skatteinnbetalingane i 2019 til staten og folketrygda. Ein dryg femdel gjekk til kommuneforvaltninga.   

Figur 2 viser innbetalingane til primærkommunane fordelt på fylka i landet. 29 milliardar kroner vart betalt inn til Oslo kommune i 2019. Til kommunane i Akershus og Hordaland vart det betalt inn 24 og 17 milliardar kroner, høvesvis. Innbetalingane til kommuneforvaltninga sett under eitt auka med nesten 5 prosent i 2019 jamført med 2018.

Figur 3 viser at personlege skattytarar medrekna arbeidsgjevaravgift betalte drygt tre firedelar av dei samla skattane i 2019. I 2008 utgjorde denne delen i underkant av 60 prosent. Dei upersonlege skattytarane utanfor petroleumssektoren har over tid bidrege med omkring ein tidel, inkludert i 2019. Skatt på utvinning av petroleum, som i 2008 utgjorde nesten ein tredel av dei samla innbetalingane, stod for knapt 14 prosent i 2019.