Konsumprisindeksen, 15. februar 2007

KPI var 117,5 (1998=100) per februar 2007 mot 116,6 på same tid i fjor, som tilsvarar ein vekst på 0,8 prosent dei siste tolv månadene, ned frå 1,2 prosent i januar. Tolvmånadersveksten i KPI-JAE var 1,1 prosent i februar, ein oppgang på 0,1 prosentpoeng frå januar.

Høgare prisar på matvarer og møblar frå januar til februar

KPI steig med 0,4 prosent frå januar til februar, noko som var eit resultat av prisauke i fleire konsumgrupper. Prisane på mat og møblar bidrog mest til veksten. Matvareprisane steig samla med 1,4 prosent. Dei fleste matvaregruppene hadde prisvekst i februar, men det var særleg prisane på fisk og gruppa kaffi, te og kakao som auka.

Etter tilbodsaktivitet i januar steig prisane på møblar med 5,9 prosent i februar. Prisane på møblar fall med 3,8 prosent i januar og ligg nå over prisnivået før salet starta. Prisane på klede steig med 1,5 prosent i februar, etter eit kraftig fall på 12,0 prosent førre månad. Det vart framleis registrert noko tilbod i februar.

Det vart også registrert prisoppgang på varer knytte til vedlikehald og reparasjon av bustad samt restauranttenester med ein stigning på høvesvis 2,0 og 2,7 prosent i februar.

I motsett retning bidrog elektrisitetsprisane inkludert nettleige til å dempe prisveksten. Med ein nedgang på 6,9 prosent frå januar til februar har elektrisitetsprisane falle med heile 32,6 prosent sidan september i fjor. Veksten i KPI utan elektrisitet (KPI-JEL) var 0,7 prosent frå januar til februar.

Låg prisvekst siste tolv månader

KPI steig med 0,8 prosent frå februar 2006 til februar 2007. Det største tilskotet til prisveksten kom frå matvarer og alkoholfrie drikkevarer, som steig med 2,4 prosent. Prisane på vedlikehald og reparasjon av bustad viste ein auke på 4,3 prosent, og det var både prisar på varer og tenester som gjekk opp. Betalt husleige for leigetakarar og estimert husleige for sjølveigarar steig med høvesvis 2,0 og 1,7 prosent frå februar i fjor til februar i år.

Andre viktige tilskot til tolvmånadersveksten i KPI kom frå prisvekst på ulike tenester. Prisane på kultur- og fritidstenester steig med 7,4 prosent, medan transporttenester auka med 4,1 prosent. Prisane på hotell- og restauranttenester gjekk opp med 3,8 prosent frå februar 2006 til februar 2007.

Etter å ha vore den viktigaste drivkrafta bak veksten i KPI gjennom heile fjoråret, medverka elektrisitetsprisane til å redusere tolvmånadersveksten i KPI i februar. Elektrisitetsprisane låg 11,5 prosent lågare enn på same tid i fjor.

Prisane på klede medverka og til å dempe veksten i KPI siste tolv månader med prisfall på 7,2 prosent. Lågare prisar på audiovisuelt utstyr og teletenester medverka også til å trekkje ned veksten i KPI.

Fall i tolvmånadersveksten i KPI - svak oppgang i KPI-JAE

Tolvmånadersveksten i KPI fall frå 1,2 prosent i januar til 0,8 prosent i februar. Nedgangen kjem i all hovudsak av prisutviklinga på elektrisitet. Prisane på elektrisitet gjekk ned med 6,9 prosent i februar i år, medan dei steig med 9,3 prosent på same tid i fjor.

Tolvmånadersveksten i KPI-JAE gjekk opp frå 1,0 til 1,1 prosent frå januar til februar 2007.