– Svak krone trekkjer fleire utlendingar til Noreg og kan ha bidrege til dei rekordmange nyetableringane i utelivsbransjen, seier seksjonssjef Erik Fjærli.
Talet på nyetableringar fall i andre delar av tenestenæringane. Innan både «kulturell verksemd, underhaldning og fritidsaktivitetar» og «informasjon og kommunikasjon» var nedgangen på 13 prosent frå 2. kvartal året før. I kulturnæringa hamna etableringstakta på eit moderat nivå, historisk sett, medan den stadig ligg høgt innan informasjon og kommunikasjon.
Det vart etablert 177 norskregistrerte utanlandske føretak (NUF) i 2. kvartal 2024, 58 prosent fleire enn i same kvartal året før.
– Det blir etablert like mange NUF no som før pandemien, seier Erik Fjærli.
Talet på nye aksjeselskap og einskildpersonføretak endra seg nokså lite, med høvesvis ein auke på 3 prosent og ein nedgang på 3 prosent.
Talet på nye føretak fall med 10 prosent i Nord-Noreg frå 2. kvartal året før. På Svalbard var fallet på heile 55 prosent, til eit historisk sett nokså lågt nivå, men sidan talet på etableringar er lågt der må ein forvente store prosentvise utslag.
Det er eit stort etterslep i registreringa av næringa til nye føretak, og etterslepet har vore stort heilt sidan starten av pandemien. Delen av nye føretak med ukjend næring er no redusert til om lag ein tredjedel sidan toppen i 2. kvartal 2022, men den er stadig så høg at fordelinga etter næring må tolkast varsamt. Det gjeld særleg ved samanlikningar bakover i tid.