Konjunkturbarometer for industri og bergverk, 3. kvartal 2001

For industrien samla sett blir 3. kvartal vurdert som negativt. Det blir rapportert om uendra produksjon, redusert sysselsetjing og lågare ordretilgang både frå heime- og eksportmarknaden. Den samla ordrebehaldninga er òg redusert. Prisutviklinga har vore positiv på heimemarknaden, men klart negativ for eksportmarknaden. Kapasitetsutnyttinga innan industrien har vore om lag uendra på omkring 80 prosent.

Det generelle utsynet for det komande kvartalet blir vurdert som positivt. Det er likevel ein nedgang i talet på leiarar som ventar ei betring. Mange rapporterer at dei justerer ned sine planar for realinvesteringar, og ein ventar vidare nedgang i sysselsetjinga.

Vi ser ingen klare teikn til at terroren i USA og dei pågåande militære operasjonane gjev store utslag i resultata frå industrien. Dette kan kome av at mange av resultata var mottekne kort tid etter terrorangrepet, og at få av leiarane kunne sjå konsekvensane for eiga næring. Vi ser ikkje bort frå at hendingane vil få større konsekvensar på noko lengre sikt.

Innsatsvarer: Svikt i etterspurnaden

Bransjar som produserer innsatsvarer (treforedling, kjemisk industri, metallindustri med fleire)

viser mange negative teikn. Produksjonen vart lågare i 3. kvartal, saman med ordretilgang og sysselsetjing. Leiarane rapporterer om problem med etterspurnaden og mange av bransjane har låge prisar på produkta sine på verdsmarknaden. Kapasitetsutnyttinga ligg no på omkring 80 prosent, som er om lag uendra frå førre kvartal.

Det generelle utsynet for 4. kvartal er vurdert som dårlegare. Dette er knytt til forventningar om lågare prisar og noko lågare ordretilgang frå eksportmarknaden. Det er òg venta ein nedgang i sysselsetjinga. Svikt i etterspurnaden blir rekna som den største avgrensande faktoren for produksjonen.

Investeringsvarer: Auka produksjon

Industribransjar som produserer investeringsvarer (metallvarer, maskinvarer, plattformer, skipsverft med fleire) har auka produksjonsvolumet i 3. kvartal. Det har vore ein auke i sysselsetjinga og i kapasitetsutnyttinga som var på om lag 83 prosent. Mangel på kvalifisert arbeidskraft har vore ein viktig avgrensande årsak i produksjonen, og dette vil venteleg også gjelde for 4. kvartal. Ordretilgangen frå eksportmarknaden har vore om lag uendra i 3. kvartal og behaldninga av eksportreservar er for tida lågare enn normalt

Det generelle utsynet for komande kvartal er vurdert som betre enn for 3. kvartal av mange leiarar. Dei ventar ein auke i produksjonen, auke i ordretilgangen og i prisnivået på heimemarknaden. Eksportprisane er venta å bli om lag uendra.

Konsumvarer: Ventar lågare sysselsetjing

I 3. kvartal vart produksjonen om lag uendra for industribransjar som produserer konsumvarer (næringsmiddelindustri, forlagsverksemd, farmasøytisk-industri med fleire). Det er vidare meldt om stabil ordretilgang og høgare prisnivå på heime- og eksportmarknaden i 3. kvartal.

Færre leiarar melder om problem med tilgang på råstoff. Det er fleire som peikar på etterspurnaden på heimemarknaden som ein avgrensande faktor for produksjonen.

For 4. kvartal er det generelle utsynet om lag uendra, og ein legg til grunn moderat auke i produksjon og etterspurnad. Ein ventar ein reduksjon i sysselsetjinga innan disse bransjane samla sett. Prisauke på heime- og eksportmarknaden vert venta i 4. kvartal.