Konjunkturbarometer for industri og bergverk, 3. kvartal 2002

For industrien samla sett blir utviklinga i 3. kvartal vurdert som negativ. Det blir rapportert om moderat nedgang i samla produksjonsvolum, og sysselsetjinga held fram med å falle. Gjennomsnittleg kapasitetsutnytting er om lag 79 prosent. Mangel på kvalifisert arbeidskraft ser ikkje lenger ut til å vere ein viktig avgrensande faktor for produksjonen. Samla ordretilgang frå heimemarknaden syner merkbar nedgang frå førre kvartal, medan etterspurnaden frå eksportmarknaden også held fram med å falle. Stadig fleire leiarar melder at veksande konkurranse i EU-marknaden verkar avgrensande for produksjonen. Lågt prisnivå i eksportmarknaden utgjer framleis eit stort problem for industrien.

Det generelle utsynet for industrien på kort sikt blir vurdert som negativt. Det er forventing om lågare produksjonsvolum og kapasitetsutnytting, og fleire leiarar melder at auka konkurranse på EU-marknaden vil vere ein avgrensande faktor for produksjonen. Planane for realinvesteringar og framtidig sysselsetjingsnivå blir justert ned. I tillegg aukar talet på leiarar som trur på lågare ordretilgang og prisnivå i eksportmarknaden. På mellomlang sikt er det stadig færre som ventar auke i eksportprisane.

Innsatsvarer: Aukande pessimisme på kort sikt

Bransjar som produserer innsatsvarer (treforedling, kjemisk industri, metallindustri med fleire)

melder om stabil utvikling i kapasitetsutnytting og produksjonsvolum. Samla sysselsetjingsnivå held fram med å falle. Fleire leiarar melder om kapasitetsvanskar som ein avgrensande faktor for produksjonen, medan færre seier det same om konkurransetilhøva i heimemarknaden. Lågare etterspurnad i heimemarknaden blir i stor grad vege opp av ein moderat auke i ordretilgangen frå eksportmarknaden.

Det generelle utsynet på kort sikt blir vurdert som dårlegare. Dette er i hovudsak knytt til forventingar om negativ prisutvikling i eksportmarknaden. På mellomlang sikt trur ein at eksportprisane vil halde fram med å falle.

Investeringsvarer: Sviktande etterspurnad og lågare prisar

Industribransjar som produserer investeringsvarer (metallvarer, maskinvarer, plattformer, skipsverft med fleire) melder om reduksjon i kapasitetsutnytting og produksjonsvolum. Auken i sysselsetjinga syner teikn til å stagnere, og det er stadig færre som reknar mangel på kvalifisert arbeidskraft som ein avgrensande faktor for produksjonen. Ordretilgangen frå heimemarknaden er markant lågare enn i førre kvartal, og etterspurnaden frå eksportmarknaden held fram med å vere svak. Den negative utviklinga i ordretilgangen kjem også til uttrykk i form av stadig lågare priser både heime og ute.

Det generelle utsynet for komande kvartal blir vurdert som negativt av svært mange leiarar. I tillegg til svikt i etterspurnad og lågare prisar, ventar dei nedgang i produksjon, kapasitetsutnytting og sysselsetjing. Fire av fem leiarar melder at svakare etterspurnad og skjerpa konkurranse vil vere ein avgrensande faktor for produksjonen. På mellomlang sikt trur ein at prisane vil halde fram med å falle.

Konsumvarer: Små endringar frå førre kvartal

Industribransjar som produserer konsumvarer (næringsmiddelindustri, forlagsverksemd, farmasøytisk industri med fleire) melder om stabil produksjon og veksande kapasitetsutnytting. Samla ordrebehaldning er om lag uendra frå førre måling, men fleire leiarar peiker på veksande konkurranse i heimemarknaden som ein faktor som avgrensar produksjonen. Lågt prisnivå i eksportmarknaden utgjer framleis eit stort problem for enkelte bransjar.

Det generelle utsynet for komande kvartal er svakt positivt, og det er inga store endringar frå førre måling. Det blir registrert ein merkbar auke i talet på leiarar som ventar høgare produksjonsvolum på mellomlang sikt.

Kommentar til resultat frå trendberekning:

Låge verdiar for endepunkta til nokre av dei ujusterte tidsseriane verkar merkbart inn på trendjusterte resultat frå tidlegare målingar.