Konjunkturbarometer for industri og bergverk, 3. kvartal 2003

Konjunkturbarometeret for 3. kvartal 2003 syner at eit lågare innanlandsk rentenivå førebels ikkje har gitt seg utslag i merkbar betring av tilhøva for norsk industri. Industrileiarane melder om nedgang i produksjonsvolum, kapasitetsutnytting og sysselsetjing. Ordretilgangen er framleis låg, men den negative utviklinga i eksportprisane ser ut til å ha stogga. Gjennomsnittleg kapasitetsutnytting blir vurdert til å vere om lag 78 prosent. Talet på industrileiarar som trur på betring i komande kvartal held fram med å vakse. Det er venta auke i produksjon og samla ordrebehaldning. Samansett indikator for industrien (sjå eige avsnitt) er positiv for fyrste gong på fem kvartal og syner ein liknande tendens

Innsatsvarer: Svakt kvartal for produsentar av ikkje-jernhaldige metall

Produsentar av innsatsvarer (treforedling, kjemisk industri, metallindustri med fleire) melder om nedgang i produksjonsvolum og kapasitetsutnytting. Lågt aktivitetsnivå i næringa produksjon av ikkje-jernhaldige metall medverka sterkt til denne utviklinga. Innanlandsk prisnivå heldt fram å falle, medan eksportprisane auka. Det siste kjem hovudsakleg av ein lågare kronekurs. Færre leiarar peikar på innanlandsk etterspurnad som ein flaskehals for produksjonen.

Det generelle utsynet for komande kvartal er framleis svakt positivt. Samansett indikator for innsatsvarer stadfestar dette synet.

Investeringsvarer: Framleis vanskelege tider

Produsentar av investeringsvarer (metallvarer, maskinvarer, plattformer og skipsverft med fleire) har vore gjennom enno eit vanskeleg kvartal. Samla produksjonsvolum og kapasitetsutnytting heldt fram med å falle, og det var ikkje teikn til betring i ordresituasjonen. Ein auke i talet på leiarar som melder om mangel på kvalifisert arbeidskraft og ei større mengd bedrifter med full kapasitetsutnytting - kan vere eit signal om at enkelte næringar har fått meir å gjere.

Det generelle utsynet for komande kvartal er framleis negativt, men stadig færre leiarar er av denne meining. Ordresituasjonen er venta å betre seg.

Konsumvarer: Negativ utvikling i 3. kvartal

Produsentar av konsumvarer (næringsmiddelindustri, forlagsverksemd, farmasøytisk industri med fleire) melder om redusert produksjonsvolum og kapasitetsutnytting. Svak ordretilgang vitnar om at dei positive forventningane til 3. kvartal ikkje har halde stikk. Færre industrileiarar peiker på låg etterspurnad i eksportmarknaden som ein flaskehals for produksjonen.

Det generelle utsynet for komande kvartal er positivt. Ei mogleg forklaring på dette er forventning om at eit lågt innanlandsk rentenivå vil resultere i auka etterspurnad og betra prisar for denne typen produkt.

Publisering av ny indikator i Konjunkturbarometeret

Frå 3. kvartal 2003 vil publiseringa av Konjunkturbarometeret innehalde ein ny indikator; "Samansett indikator for industri". Denne indikatoren er det aritmetiske gjennomsnitt av svara (nettotal) for forventa produksjon, ordrebehaldning og lagerbehaldning av eigne produkt (det siste med motsett forteikn). Indikatoren skal være leiande for industriell produksjon:

• Forventning om auka produksjon gir signal om auka aktivitet i det komande kvartalet.
• Auke i ordrebehaldninga indikerar auka aktivitet når desse ordrane skal effektuerast.
• Lageroppbygging av eigne produkt gir signal om lågare sal og dermed redusert produksjon i det komande kvartalet.

Indikatoren er harmonisert med EUROSTAT sin samansette konjunkturindikator; "The Industrial Confidence Indicator". Den vil bli publisert i tabell 17 og i Statistikkbanken. I tillegg vil resultat bli presenterte grafisk som eit fast innslag i pressemeldinga. For Internasjonale samanlikningar av resultat for denne indikatoren viser vi til EUROSTAT (EU), Konjunkturinstitutet (Sverige) og Danmarks statistikk på Internett.