Rettleiinga til spørsmål i seksjon 2 der vi ber dykk gje opplysningar om eigedomsskatteordninga som er vedteken for kommunen for 2025

Spørsmål 2.2

Skjemaet gjeld for alle dei ulike områda kommunen kan skrive ut eigedomsskatt på ifølge § 3 a) - g) i Eigedomsskattelova (Lovdata). Kommunen merkar av for det utskrivingsalternativet som kommunestyret har vedteke.

Spørsmål 2.3

Eigedomsskattelova §§ 11 til 13 (Lovdata)  gjeld reglar om eigedomsskattesatsar. Av § 11 kjem det fram at satsen generelt må liggje i intervallet 1-7 promille av takstverdet, men skattesatsen for bustader og fritidsbustader kan maksimalt vera 4 promille av takstverdet. Utgangspunktet er at kommunestyret fastset ein generell skattesats som gjeld for alle typar eigedomar. Her skal ein gje opp den generelle skattesatsen for 2025.

Spørsmål 2.4

Høvet til å fastsetje ulike skattesatsar regulerast av Eigedomsskattelova § 12 (Lovdata). Dette spørsmålet skal ein berre svare på om kommunen har ein eigen skattesats for bustadar og fritidsbustader som skil seg frå dei andre skattlagde eigedomane.

Spørsmål 2.5

Her ber vi dykk svare på frå kva år kommunen hadde nye takstar som følgje av sist utførte alminnelege taksering av alle eigedomar med skatteplikt i kommunen.

Spørsmål 2.6

Kommunestyret kan kvart år velgje å gje eit botnfrådrag for bustader/fritidsbustader, jf. Eigedomsskattelova § 11 (Lovdata) andre ledd. Botnfrådraget kjem til frådrag i eigedomsskattetaksten etter at taksten er redusert med dei obligatoriske 30 %, jf. Eigedomsskattelova § 8 A-2 (Lovdata). Botnfrådrag kan innførast/aukast/senkast/fjernast frå det eine året til det andre.

Spørsmål 2.7

Her ber vi dykk svare på om kommunestyret gjev fritak frå eigedomsskatt for nye bustader. Ein kan gje fritak i opptil 20 år frå den tida bygningen vart ferdig, jf. Eigedomsskattelova § 7 c (Lovdata).

Spørsmål 2.8

Her ber vi dykk svare på om kommunestyret gjev fritak frå eigedomsskatt for historiske bygningar som til dømes er freda, jf. Eigedomsskattelova § 7 b (Lovdata).

Spørsmål 2.9

Her ber vi dykk svare på om kommunestyret gjev fritak frå eigedomsskatt for fritidsbustader, jf. Eigedomsskattelova § 7 e (lovdata).

Spørsmål 2.10

I staden for kommunal taksering av bustader, kan kommunen nytte seg av Skatteetatens formuesgrunnlag (bustadverdet) ved verdsetjing av bustader, jf. Eigedomsskattelova § 8 C-1 (Lovdata).

Rettleiing til spørsmål i seksjon 3 der vi ber dykk gje opplysningar som gjeld eigedomsskatten for 2024

Spørsmål 3.1:

Ver venleg å føre opp gjennomsnittleg årleg utskriven eigedomsskatt for bustader i 2024.

Vi ber dykk føre opp eit gjennomsnittstal berekna som summen av årleg utskriven eigedomsskatt for bustader i kommunen delt på alle bustader som det er skrive ut eigedomsskatt for. Nærare spesifikasjon:

  • Vi ber om gjennomsnittleg årleg utskriven eigedomsskatt for alle bustader i kommunen for i fjor. Det vil seie at i KOSTRA skjema 33 for eigedomsskatt som vert sendt inn våren 2025, ber vi om gjennomsnittleg årleg utskriven eigedomsskatt for 2024. Grunnlaget for rapporteringa er bustadene som vart førte opp på den eigedomsskattelista som blei lagt ut til offentleg ettersyn før utskrivingsfristen i 2024.
  • Alle bustader som det vert skrive ut eigedomsskatt for skal teljast med ved gjennomsnittsberekninga, også bustader med meir enn éin bustadeining. Det vil seie at kvar einskilt bustadeining i burettslag, andre ikkje-seksjonerte bygg, einebustader med sokkelleilegheit osv., teljast med i talet på bustadeiningar som samla utskriven eigedomsskatt i 2024 skal delast på.
  • Bustadeiningar der berekna eigedomsskatt er lågare enn grensa på 300 kr for å skrive ut skatten (jamfør Eigedomsskattelova § 14 (Lovdata), fjerde ledd), skal teljast med i talet på bustadeiningar som er med i gjennomsnittsberekninga.
  • Dersom tomt, garasjar mv. er med i taksten for ein bustadeigedom, tas det med i berekninga av utskriven skatt for bustaden.
  • Våningshus på landbrukseigedom tas med. Landbrukseigedomar består gjerne av 2-3-bustader, garasje, seter, naust, koier/hytter mv. Taksten er da ofte samla for alt som det skal skattast av, og skatten er samla skatt på alle bygg og tomt. Her skal alle bustadeiningar som inngår i taksten, telja med ved gjennomsnittsberekninga.
  • Fritidsbustader teljast ikkje med. For kommunar som ikkje har merka bustadene som fritidsbustader, så må ein halde bustader i typiske hytteområde utanfor gjennomsnittsberekninga.
  • Bustader med fritak for eigedomsskatt teljast ikkje med, berre bustader som det er skrive ut eigedomsskatt for i 2024. Vi tel likevel med dei bustadene som har fått berekna eigedomsskatt som er lågare enn grensa på 300 kr for å skrive ut skatten. 

Spørsmål 3.2:

Kor høg var eigedomsskatten på ein einebustad på 120 m² bruksareal (BRA) i 2024?

Kommunen kan nytte følgjande metode for berekning:

{[(Sjablongverdi (m2-pris) for einebustader utan å korrigera for sonefaktor, byggjeår eller faktorar basert på skjønn x 120) + (tomtepris per m2 x 1 000)] x 0,7} x skattesats.

Døme: {[(12 000 x 120)+(75 x 1 000)]x0,7} x 0,005 = 5302,50 kroner. Dersom kommunen har innført botnfrådrag, trekkjast dette i frå før ein multipliserer med skattesatsen.