Internett-målinga (avslutta i Statistisk sentralbyrå), 2012

Det var 1 716 000 private breibandsabonnement med faste tilgangar til Internett i Noreg med Svalbard ved utgangen av 4. kvartal 2012. Dette er ein auke på om lag 15 000 abonnement frå 3. kvartal 2012, og ein auke på 67 000 i høve til det same tidspunktet i 2011.

Utviklinga av abonnement i bedriftsmarknaden har stoppa opp, og talet på faste abonnement var 136 000 i 4. kvartal 2012.

Jamn auke i hastigheita

Den gjennomsnittlege hastigheita for private breiband har stige frå 14,8 Mbit/s i 3. kvartal 2012 til 15,6 Mbit/s i 4. kvartal same året. Samstundes har medianverdien for private breiband auka frå 7,9 til 8,6 Mbit/s. I 4. kvartal 2011 var den gjennomsnittlege hastigheita 11,4 og medianverdien 6,7 Mbit/s.

Den gjennomsnittlege hastigheita for bedriftsbreiband har sidan det føregåande kvartalet stige frå 10,3 Mbit/s til 11,0 Mbit/s. Samstundes har medianverdien for bedriftsbreiband auka frå 4,9 til 5,3 Mbit/s.

I 4. kvartal 2012 hadde 51 prosent av dei private breibandsabonnementa ein hastigheit på over 8 Mbit/s. Dette er ein oppgang frå 49 prosent i kvartalet før. Tilsvarande tal for bedriftsmarknaden var respektive 34 prosent og 32 prosent.

Rogaland raskast

I Fastlands-Noreg er det framleis hushalda i Rogaland som har flest raske breiband. 69 prosent av alle private abonnement i fylket har ein hastigheit på over 8 Mbit/s. På Svalbard er talet heile 78 prosent. Den lågaste delen med raske private breiband har Oppland og Hedmark med respektive 35 og 36 prosent. Gjennomsnittshastigheita for private breiband er på 23,3 Mbit/s i Rogaland, medan Hedmark og Sogn og Fjordane har gjennomsnittstal under 10 Mbit/s.

Skilnadene mellom fylka er mykje mindre for bedriftsbreibanda. Delen med raske breiband over 8 Mbit/s varierer mellom 29 prosent i Oppland, Hedmark, Rogaland og Hordaland og 43 prosent i Møre og Romsdal. Gjennomsnittshastigheita for bedriftsbreiband er høgast i Oslo med 14,5 Mbit/s og lågast i Oppland med 8,1 Mbit/s.

Oslo har flest breibandsabonnement i hushalda

På landsbasis hadde 77 prosent av hushalda breiband i 4. kvartal 2012. Auken frå 4. kvartal 2011 er 2 prosentpoeng. Oslo er fylket med flest breibandsabonnement i prosent av hushalda, med 84 prosent. På Svalbard er talet 96 prosent. Finnmark har stadig lågast privat utbreiing av breiband med 63 prosent.