Internett-målinga (avslutta i Statistisk sentralbyrå), 2014

I 3. kvartal 2014 gjekk den gjennomsnittlege hastigheita på private breiband opp frå 23,1 til 26,7 Mbit/s. Samstundes har medianverdien for hastigheita til private breiband stige frå 17,8 Mbit/s i 2. kvartal til 18,9 Mbit/s. I 3. kvartal 2013 var medianverdien 9,2 og den gjennomsnittlege hastigheita 17,7 Mbit/s.

I 3. kvartal 2014 hadde 66 prosent av dei private breibandsabonnementa ei hastigheit på over 8 Mbit/s. Dette er ein auke frå 65 prosent i kvartalet før. Tilsvarande del for bedriftsmarknaden gjekk opp frå 44 til 47 prosent i denne perioden.

Den gjennomsnittlege hastigheita for bedriftsbreiband har sidan 2. kvartal 2014 stige frå 15,1 Mbit/s til 16,0 Mbit/s. Samstundes har medianverdien for bedriftsbreiband gått opp frå 6,6 til 7,1 Mbit/s.

Kortvarig stopp i abonnementsveksten for private breiband

Nedgangen i talet på faste private breiband i 2. kvartal er i 3. kvartal snudd til ein ny auke på 21 000 abonnement. Det var 1 829 000 private breibandsabonnement med faste tilgangar til Internett i Noreg, inkludert Svalbard, ved utgangen av 3. kvartal 2014. Samanlikna med 3. kvartal året før er det ein vekst på 78 000.

Talet på abonnement i bedriftsmarknaden var om lag 133 000 i 3. kvartal 2014. Dette er om lag det same som i kvartalet før, og jamvel det same som i 3. kvartal 2013.

Flest raske private breiband i Rogaland

I Fastlands-Noreg er det framleis hushalda i Rogaland som har flest breiband med kapasitet over 8 Mbit/s. 78 prosent av alle private abonnement i fylket har ei så høg hastigheit. På Svalbard er den tilsvarande delen heile 99 prosent. Den minste delen med private breiband på over 8 Mbit/s har Sogn og Fjordane, med 52 prosent. Gjennomsnittshastigheita for private breiband er høgast i Rogaland, med 35,7 Mbit/s, medan Finnmark ligg lågast på lista med eit gjennomsnittstal på 13,4 Mbit/s.

Skilnadene mellom fylka er mykje mindre for bedriftsbreibanda. Delen med raske breiband over 8 Mbit/s varierer mellom 38 prosent i Nord-Trøndelag og 53 prosent i Oslo. Gjennomsnittshastigheita for bedriftsbreiband er høgast i Oslo med 21,5 Mbit/s og lågast i Oppland med 11,2 Mbit/s.

Meir enn åtte av ti hushald har faste breiband

På landsbasis hadde 81 prosent av hushalda breiband i 3. kvartal 2014. Det er ein auke på 1 prosentpoeng frå kvartalet før. Auken frå 3. kvartal 2013 er på 3 prosentpoeng. Oslo er det fylket med flest breibandsabonnement i prosent av hushalda: 90 prosent. På Svalbard er delen 92 prosent. Finnmark har stadig lågast privat utbreiing av breiband, med 69 prosent.