Internett-målinga (avslutta i Statistisk sentralbyrå), 2002

Eitt av fire Internett-abonnement som blei teikna i 2. kvartal var breibandsabonnement. Breibandsabonnementa hadde ein prosentvis auke på 50 prosent i høve til 1. kvartal, medan abonnement med lågare overføringskapasitet berre auka med 3 prosent. Det er likevel abonnement med tilkopling via analogt modem og ISDN som utgjer størsteparten av abonnementa, med høvesvis 44 og 51 prosent.

I denne statistikken vert breiband rekna som Internett-abonnement med overføringskapasitet (fart inn) høgare enn 384 Kbit per sekund.

Mest breiband i byar

Fylke med tett busetnad har mest breiband både når det gjeld private abonnement og bedriftsabonnement. Det finst færre abonnement med denne overføringskapasiteten i fylke med spreidd busetnad. Den geografiske utbreiinga av breiband er mellom anna knytt til høvet til å ta i bruk teknologiar som kabel, ADSL eller liknande.

Tre millionar Internett-abonnement

Internett-abonnement totalt fordelte seg på om lag 158 000 bedriftsabonnement og vel 2,7 millionar private abonnement. I høve til 1. kvartal auka abonnementstala med 13,5 prosent for bedriftsabonnement og 3,2 prosent for private abonnement.

Både privatpersonar og bedrifter kan teikne fleire Internett-abonnement, likeeins kan fleire privatpersonar bruke eitt abonnement. Talet på abonnement er difor ikkje det same som talet på personar/bedrifter med Internett-tilgang. Abonnementstala inneheld også abonnement som ikkje har vorte brukt i det siste kvartalet. Blant abonnement med analogt modem og ISDN er det særskild mange inaktive abonnement.

Tala byggjer på opplysningar frå leverandørar av Internett-tilgang. Vi gjer merksam på at tala for 1. kvartal har vorte reviderte sidan frigivinga 26. juni 2002. Statistikken vil etter kvart inkludere variablar som skildrar bruken av Internett. Det er ei målsetjing å publisere tal på eit meir detaljert regionalt nivå. For meir informasjon, sjå i Om statistikken.

Tabeller:

• Tabell 1 Privatmarknaden. Internett-abonnement fordelt etter overføringskapasitet og fylke. 2. kvartal 2002
• Tabell 2 Bedriftsmarknaden. Internett-abonnement fordelt etter overføringskapasitet og fylke. 2. kvartal 2002
• Tabell 3 Privatmarknaden. Utviklingstrekk. Internett-abonnement fordelt etter overføringskapasitet og fylke. 1. og 2. kvartal 2002
• Tabell 4 Bedriftsmarknaden. Utviklingstrekk. Internett-abonnement fordelt etter overføringskapasitet og fylke. 1. og 2. kvartal 2002