Internett-målinga (avslutta i Statistisk sentralbyrå), 2006

1 134 000 av breibandsabonnementa var private abonnement. I bedriftsmarknaden var det 125 000 abonnement. I båe desse marknadene var auken på 25 prosent frå 4. kvartal 2005. Dette er ein nedgang i veksten frå om lag 34 prosent i førre kvartal.

Dei geografiske forskjellane er framleis store. Vest-Agder er no fylket med flest breibandsabonnement i høve til hushalda, med om lag 64 prosent. Dei andre fylka med over 60 prosent er Oslo, Rogaland og Akershus. Finnmark, Hedmark, Oppland og Telemark er i andre enden av fordelinga med 45 til 46 prosent.

Delen av breibandsabonnementa som har ein hastigheit over 1 Mbit/s har auka til 89 prosent. For høgare hastigheiter er det framleis geografiske forskjellar. I Rogaland og Sogn og Fjordane har over 70 prosent ein hastigheit over 2 Mbit/s, medan berre 47 prosent i Sør-Trøndelag og om lag 56 prosent i Hordaland, Nordland, Hedmark og Troms har ein slik hastigheit.

Deler ein inn kommunane etter SSB sin Standard for kommuneklassifisering, ser ein at dei sentrale kommunane har høgast del breibandsabonnement i høve til hushalda med 60 prosent. Til samanlikning er det berre 43 prosent i dei minst sentrale kommunane som har breiband.

Det er seksten kommunar kor det er meir enn 65 prosent breibandsabonnement i høve til hushalda. Sju av desse ligg i Rogaland. Dei andre kommunane finn vi i Møre og Romsdal, Hordaland, Aust-Agder, Vest-Agder og Akershus.

Frå og med dette kvartalet hentar vi opplysningar frå alle slags internettleverandørar. Det gjeld til dømes Modalen kommune, som har tilbod om breiband gjennom ei gratis ordning i regi av sin eigen kommune, og Tranøy kommune, som tar betalt for tenesta. I andre kommunar er det kraftlaget som står for den kommunale satsinga. Vidare er det fleire partslag som leverer Internett. For desse er det uklårt om dei driv på kommersielle vilkår eller om betalinga berre dekkjer kostnadene. Denne utvidinga er gjort for at statistikken skal vise kor mange private og bedrifter som har Internett med breiband utan omsyn til leverandøren sin organisasjonsform eller prisen på tenesta. For heile landet og kvart fylke tyder denne endringa lite. For nokre få einskilde kommunar tyder dette mykje. I samband med utvidinga av omfanget av statistikken vart fleire andre lokale leverandørar oppdaga og teke med. Kvaliteten på statistikken for kvar einskild kommune er difor vonleg betre enn tidlegare. Endringar i bransjen med samanslåingar eller oppkjøp kan føre til problem med korrekt rapportering i ein periode. Dette problemet gjer at tala for einskilde kommunar kan variere meir enn ynskeleg.

Tabeller:

• Tabell 1 Privatmarknaden. Breibandsabonnement fordelt etter overføringskapasitet og fylke. 4. kvartal 2006
• Tabell 2 Bedriftsmarknaden. Breibandsabonnement fordelt etter overføringskapasitet og fylke. 4. kvartal 2006
• Tabell 3 Utviklingstrekk. Breibandsabonnement fordelt etter marknad. Berre aktive abonnement. Heile landet
• Tabell 4 Breibandsabonnement (over 128 kbit/s). Bedrifts- og privatabonnement. 4. kvartal 2006. Kommune