13754_not-searchable
/teknologi-og-innovasjon/statistikker/inet/arkiv
13754
Raskare og fleire faste breiband
statistikk
2010-11-30T10:00:00.000Z
Teknologi og innovasjon;Svalbard
no
inet, Internett-målinga (avslutta i Statistisk sentralbyrå), breibandsabonnement, overføringskapasitet, overføringshastigheit, bedriftsmarknad, privatmarknadTeknologi og innovasjon, Informasjons- og kommunikasjonsteknologi - IKT, Teknologi og innovasjon, Svalbard
false

Internett-målinga (avslutta i Statistisk sentralbyrå), 2010

Innhald

Publisert:

Du er inne i ei arkivert publisering.

Gå til den nyaste publiseringa

Raskare og fleire faste breiband

Den gjennomsnittlege hastigheita for private breibandsabonnement auka til 6,6 Mbit/s i 3. kvartal 2010. Talet på abonnement på faste tilgangar til breiband steig med 2 prosent frå førre kvartalet. Auken var 4 prosent frå 3. kvartal førre året.

Private breibandsabonnement fordelte etter hastigheitsgruppe. Medianverdi og gjennomsnitt. 3. kvartal 2010

Den gjennomsnittlege hastigheita for private breiband har stige frå 6,3 til 6,6 Mbit/s. Medianverdien for private breiband har også auka, frå 3,9 til 4,1 Mbit/s.

Delen av dei private breibandsabonnementa som har ein hastigheit over 8 Mbit/s, var 28 prosent i 3. kvartal 2010. Dette er ein auke frå 26 prosent i det førre kvartalet. Det tilsvarande talet for bedriftsmarknaden var 15 prosent, ein auke frå 14 prosent i 2. kvartal 2010.

I privatmarknaden er det hushalda i Rogaland som har flest raske breiband, med 51 prosent av alle abonnentane over 8 Mbit/s.

Faste tilgangar til Internett aukar

I Fastlands-Noreg var det 1 720 000 breibandsabonnement med faste tilgangar til Internett ved utgangen av 3. kvartal 2010. Dette er ein auke på 67 000 i høve til same periode i 2009. Samanlikna med førre kvartalet er det ein auke på 26 000 abonnement. Heile auken gjeld private abonnement. Bedriftsmarknaden minka med 600 abonnement i same periode. Av breibandsabonnementa var 1 568 000 private, medan bedriftsmarknaden hadde 152 000 abonnement.

Breibandsabonnement fordelte etter marknad. 3. kvartal 2002-3. kvartal 2010

Jamn auke av breiband i hushalda

Talet på private breiband i høve til hushalda var 72 prosent for heile landet i 3. kvartal i år. Dette er 1 prosent meir enn i det førre kvartalet, og 2 prosent meir enn i 3. kvartal førre året. Akershus, Oslo og Sør-Trøndelag er fylka med flest breibandsabonnement i prosent av hushalda - alle med over 78 prosent. Finnmark har stadig lågast breibandsdekning med 60 prosent, trass i ein auke på 2 prosentpoeng frå det førre kvartalet.

Private breibandsabonnement fordelt etter kommunane si sentralitetskode. 3. kvartal 2010
Sentralitet1 Breibandsabonnement Breibandsabonnement i prosent av hushalda
Minst sentrale kommunar  125 534 63
Mindre sentrale kommunar 86 713 68
Noko sentrale kommunar  255 008 69
Sentrale kommunar 1 100 647 75
1  Sentralitet 2008, Kommuner 2008.

Privatmarknaden. Breibandsabonnement (overføringskapasitet over 128 kbit/s) i prosent av hushalda. 3. kvartal 2010. Kommunar

Sentrale kommunar med høgaste del breibandsabonnement

Skilnadene mellom kommunane etter sentralitetsgrad er den same som før. Dei sentrale kommunane har høgast del breibandsabonnement i høve til hushalda, med 75 prosent. Til samanlikning har 63 prosent i dei minst sentrale kommunane breiband.

Fast breiband på hytta vert vanlegare

Undersøkinga skil ikkje mellom abonnement i faste bustader og fritidsbustader. Alle faste abonnement tel med. Det gjer at hyttekommunar kan få svært høge tal for private abonnement i høve til talet på hushald. Om lag ein av tre kommunar med over 80 prosent breiband i høve til hushalda er hyttekommunar.

Mobilt breiband som alternativ til fast

Ved kontrollen av tala for Lierne kommune, som ligg heilt nedst med 29 prosent breiband i høve til hushalda, kjem det fram informasjon som tyder på at mobilt breiband her har blitt eit alternativ til fast samband. I deler av slike grisgrendte kommunar er berre radiosamband og ikkje DSL, kabel-TV eller fiberkabel aktuelle. Vi har ikkje informasjon om talet på abonnement på mobile breiband fordelt på dei einskilde kommunane - eller på grender innanfor kommunane. Det ser likevel ut til at utbygging av mobilt breiband er naudsynt for at alle hushald skal få tilgang til breiband.

Kommunar med flest private breibandsabonnement ved utgangen av
3. kvartal 2010 i høve til hushalda
Kommunar Breibandsabonnement i prosent av husholda
Landsgjennomsnitt 72,2
0941 Bykle  187,0
0215 Frogn  101,2
1018 Søgne 94,7
0926 Lillesand 93,2
0213 Ski 91,9
1121 Time 90,5
1232 Eidfjord 89,8
0521 øyer 88,9
1640 Røros 88,1
0544 øystre Slidre 87,1
0834 Vinje 86,0
1151 Utsira 85,6
0216 Nesodden 85,3
1601 Trondheim 85,1
1046 Sirdal 83,7
0217 Oppegård 83,5
1246 Fjell 83,2
1563 Sunndal 82,1
0230 Lørenskog 82,0
0512 Lesja 81,7
0702 Holmestrand 80,9
0228 Rælingen 80,7
0219 Bærum 80,5

Om utrekning av median og gjennomsnitt

Medianverdien er den verdien som delar populasjonen i to like store delar - dei med høgare og dei med lågare verdiar. I utrekninga av medianverdien er det føresett at abonnementa i hastigheitsgruppa 4-8 Mbit/s delar seg jamt på alle verdiane i gruppa. Ved utrekning av gjennomsnitt har ein føresett at dette også gjeld for kvar av dei andre gruppene.

Om datagrunnlaget

Dei mobile abonnementa er fjerna fordi denne delen av statistikken ikkje har vore fullstendig, og fordi desse abonnementa ikkje er mogeleg å fordele geografisk og etter hastigheit på same vis som med dei faste tilgangane. Post- og teletilsynet lagar også statistikk over dei mobile abonnementa, men dei tek ikkje omsyn til geografisk plassering eller hastigheit.

Talet på leverandørar av breiband som gjev opplysningar til denne undersøkinga, har i dei siste åra lege på om lag 200. Endringar i bransjen har gjort at talet har gått noko ned, til rundt 180. Det manglar framleis nokre små, men lokalt viktige leverandørar av breiband i undersøkinga. Det gjeld særleg kabel-TV-selskap som også leverer Internett med breiband. Måten dei driftar anlegga sine på, gjer det noko komplisert å få dei med i undersøkinga. Nokre små feil i delinga av abonnentane mellom kommunar er oppdaga. Dette kan gjere store utslag på delen av abonnement i høve til hushalda i einskilde kommunar. Talet på hushald for 2010 er brukt i denne statistikken.

Både privatpersonar og bedrifter kan teikne fleire internettabonnement, og likeins kan fleire privatpersonar bruke eitt felles abonnement. Talet på abonnement er difor ikkje det same som talet på hushald/bedrifter med internettilgang. Til dømes kan hushalda få internettilgang gjennom arbeidsgjevar, utdanningsinstitusjon eller ved at fleire husstandar deler abonnement. Sjå også undersøkinga IKT i husholdningene .

For meir informasjon , sjå Om statistikken .

Tabeller: