Nye tal frå overnattingsstatistikken syner at det var 766 tusen utanlandske overnattingar på norske overnattingsbedrifter i februar. Samanlikna med februar 2024, var dette ein auke på 10 prosent i Merk skilnaden på «overnattingar» og «gjestar». Ein gjest kan stå for fleire overnattingar. ved dei Tala omfattar overnattingar på hotell, hyttegrend, campingplassar og vandrarheimar..
– Aldri før har det blitt registrert så mange overnattingar i Noreg i februar månad. Det var veksten i utanlandske overnattingar som bidrog til rekorden, seier Kristin Aasestad, seniorrådgjevar i Statistisk sentralbyrå.
Stor auke frå Storbritannia og Kina
Det var flest utanlandske overnattingar frå Danmark. Heile éin av fem utanlandske overnattingar i februar vart gjort av danske gjestar. Deretter følgde Storbritannia, medan Sverige kom på tredjeplass.
I februar var det største auke i talet på overnattingar frå Storbritannia. Det var 97 tusen britiske overnattingar, ein vekst på 19 tusen frå i fjor. Det var også ein kraftig auke i overnattingar frå Kina. Det var nesten 29 tusen kinesiske overnattingar i februar i år, ein auke på 13 tusen.
Det var 1,5 millionar norske overnattingar, ein nedgang på 1,5 prosent frå februar i fjor. Sist gong talet på norske overnattingar i ein februarmånad var lågare, var i 2022.
Regionale skilnader
Fleire fylke hadde ein auke i talet på overnattingar i februar i år samanlikna med same månad i fjor. Den største veksten på talet av overnattingar var i Oslo, følgt av Vestland og Troms. I Oslo var det 24 tusen fleire overnattingar. Vestland hadde ein auke på om lag 12 tusen, medan det i Troms var nesten 11 tusen fleire overnattingar. Auken i alle dei tre fylka kom først og fremst av fleire utanlandske overnattingar.
Innlandet var fylke med størst nedgang i talet på overnattingar, her var det nesten 16 tusen færre overnattingar enn i februar i fjor. Det var færre norske overnattingar som bidrog mest til nedgangen.
Noko av veksten i Nordland kjem av at nokre hotell som er med i utvalet no, ikkje var inkludert i undersøkinga i februar 2024 sjølv om dei var i drift.
Nedgang på campingplassar, hyttegrender og vandrarheimar
I februar var det registrert 433 tusen overnattingar ved campingplassar, hyttegrender og vandrarheimar. Norske overnattingar utgjorde 229 tusen, ein nedgang på 6,5 prosent. Det var nesten 204 tusen utanlandske overnattingar, ein auke på 2,8 prosent.
– Talet på norske overnattingar gjekk tilbake ved alle typar overnattingsbedrifter, både hotell, campingplassar, hyttegrender og vandrarheimar. Auken i utanlandske overnattingar ved hotell og hyttegrender og vandrarheimar bidrog likevel til at det samla vart ein vekst i overnattingar i februar, seier Aasestad.
Frå og med mars i år publiserer Statistisk sentralbyrå produksjonsindeks for tenester. Statistikken beskriv den månadlege utviklinga i verdiskaping innan marknadsretta tenestenæringar, og ei av tenestenæringane ein finn tal for i statistikken er overnattingsverksemder.