Rekneskap for ikkje-finansielle føretaks utanlandsfinansiering

Statistikken definerer utlending som utanlandsregistrerte juridiske personar, inkludert norskeigde føretak som er registrerte i utlandet. Dette betyr at også norske selskaps filialar i utlandet og fysiske personar busette i utlandet blir rekna som utlendingar.

I statistikken er det gjort eit skilje mellom anleggsmiddel, omløpsmiddel, kortsiktig og langsiktig gjeld i forhold til utanlandske konsernselskap. Det føreligg konsernforhold når eit selskap (morselskap) har bestemmende innverknad over eit eller fleire andre selskap (dotterselskap). Bestemmende innverknad inneber at eit føretak direkte eller indirekte har styringsrett over eit anna føretak.

Det same skiljet er gjort for utanlandske tilknytte selskap. Eit tilknytt selskap er eit selskap der investoren har ei betydeleg innverknad, men som ikkje er dotterselskap eller felles kontrollert verksemd. Etter rekneskapsreglane blir betydeleg innverknad normalt rekna å føreliggje når investoren har 20 prosent eller meir av stemmeberettiga kapital i slikt selskap. Anleggsmiddel i utlandet omfattar eigedelar som hovudsakleg inngår i føretaket si langsiktige verdiskapingsprosess og som er bestemt til varig eige eller bruk. Her inngår varige driftsmiddel, immaterielle eigedelar (patent, goodwill, lisensar osv.) og langsiktige kapitalplasseringar i utlandet (aksjar, andelar osv.). Fordringar og verdipapir som er føresett innløyst meir enn eitt år etter rapporteringstidspunktet blir også rekna som anleggsmiddel.

Omløpsmiddel i utlandet er eigedelar knytt til føretaket si omsetning. Eigedelar blir rekna som omløpsmiddel dersom det er avtalt eller føresett at dei skal betalast tilbake innan eitt år etter rekneskapsåret sitt utløp. I omløpsmiddel inngår betalingsmiddel, kortsiktige kapitalplasseringar i utlandet (bankinnskot, aksjar, obligasjonar og liknande) og fordringar på utlandet.

Gjeld til utlandet omfattar alle forpliktingar som kan kome til å leggje restriksjonar på den framtidige bruken av føretaket sine ressursar. Gjeld blir delt i langsiktig og kortsiktig gjeld overfor utlandet.

Langsiktig gjeld er gjeldspostar som forfell til betaling seinare enn eitt år frå rapporteringstidspunktet, og som ikkje er knytt til føretaket si kortsiktige omsetning av varer og/eller tenester.

Kortsiktig gjeld er gjeldspostar som forfell til betaling innan eitt år frå rapporteringstidspunktet eller som er direkte knytt til føretaket si kortsiktige omsetning av varer og/eller tenester.

Årsstatistikken publiserast etter landgruppering. Landgrupperinga byggjer på ISO-standarden 3166.