Nedgang i arbeidsløysa

Ifølgje sesongjusterte tal frå Arbeidskraftundersøkinga (AKU) var det i alt 91 000 arbeidslause personar i april, målt som gjennomsnittet av perioden mars - mai. Det er 16 000 færre enn i januar, målt som gjennomsnitt av perioden desember - februar. Nedgangen er utanfor feilmarginen i AKU. Nedgangen kom i hovudsak blant personar over 24 år.

Kvifor samanliknar vi med tala frå tre månader tilbake?

Brot i tala for registrerte ledige

I november 2018 tok NAV i bruk ei ny løysing for registrering av arbeidssøkarar, som gjer at dei kjem raskare inn i registeret og statistikken til NAV. SSB sesongjusterer tal frå NAV etter same metode som tidlegare. For meir informasjon om NAV si handtering av brotet, sjå NAV si utsegn.

Kvifor har NAV og SSB ulike arbeidsløysetal?

Fleire sysselsette

Frå januar til april gjekk det sesongjusterte talet på sysselsette opp med 14 000 personar. I same periode har befolkninga halde seg ganske stabil, slik at sysselsettingsprosenten har økt noko: opp 0,3 prosentpoeng til 67,8 prosent i april. Auka er innanfor feilmarginen i AKU.

Arbeidsstyrken, som er summen av dei sysselsette og arbeidslause, har også halde seg relativt stabil sidan januar. Det vil seie at nedgangen i arbeidsløysa i hovudsak er i form av fleire sysselsette, og betyr dermed ikkje at fleire står utanfor arbeidsstyrken. Personar som står utanfor arbeidsstyrken kan til dømes vere studentar, pensjonistar og uføre – men også personar som har gjeve opp å søkje arbeid, og som dermed ikkje blir klassifiserte som arbeidslause.