Arbeidskraftundersøkinga, sesongjusterte tal, januar 2005

Talet på arbeidslause i januar (tremånadersperioden desember-februar) var det same som i oktober (september-november) i fjor. Sesongjusterte tal for registrerte arbeidslause ved arbeidskontora pluss ordinære tiltaksdeltakarar minka noko i same perioden (frå oktober til januar).

Etter ein periode med negativ utvikling frå våren 2002, har sysselsetjinga sidan sommaren 2003 auka meir eller mindre kontinuerleg. I januar i år auka talet på sysselsette med 2 000 frå oktober i fjor, noko som er klårt innanfor feilmarginen til endringstala i AKU. Sysselsetjinga ser framleis ut til å vera inne i ein aukande trend.

Arbeidsløysa ned i USA og OECD-landa

Den sesongjusterte arbeidsløysa i Noreg var 4,4 prosent i januar, uendra frå oktober i fjor. Også i EU-landa var talet uendra, på 8,0 prosent. I same perioden gjekk arbeidsløysa i OECD-landa ned frå 6,8 til 6,6 prosent, og i USA frå 5,5 til 5,2 prosent. Frå oktober i fjor til januar i år minka arbeidsløysa i Sverige frå 6,2 til 6,1 prosent, medan Finland hadde ein auke frå 8,8 til 8,9 prosent. I same periode var arbeidsløysa i Frankrike og Tyskland om lag uendra på respektive 9,7 og 9,6 prosent, syner tal frå OECD og Eurostat .

Auke i vekeverkstalet

Utførde vekeverk (à 37,5 timar) har vist ein minkande tendens i perioden mellom juni 1998 og mai 2003. Sidan har tala halde seg på eit ganske stabilt nivå. Frå oktober i fjor til januar i år auka talet på utførde vekeverk med 39 000, noko som er klårt utanfor feilmarginen for endringstala i AKU. Men heile eller delar av oppgangen kjem av at det var få ekstra fridagar i samband med julehøgtida i 2004, noko som påverkar talet for januar (tremånadersperioden desember-februar).

Uvisse ved dei sesongjusterte tala

Føremålet med å justera for sesongvariasjon, er å beskriva utviklinga gjennom året og gje tal på endringar for den siste tremånadersperioden, som er reinsa for normale sesongsvingingar. Kvalitetstestar syner at dei sesongjusterte tala for AKU-arbeidsløysa er usikre. Sesongjusteringsmetoden har vanskar med å identifisera eit stabilt sesongmønster i denne talserien. Dei tilfeldige utslaga er relativt store i forhold til sesongkomponenten. I tillegg er det relativt få arbeidslause i utvalet, slik at uvissa blir stor. Dette gjer at tala må tolkast med varsemd. For å redusera utvalsuvissa, er dei publiserte AKU-tala tremånaders glidande gjennomsnitt av dei sesongjusterte tala. Til dømes er talet for januar gjennomsnittet av overslaga for desember, januar og februar.

Tabeller:

• Tabell 1. Sysselsetjing og arbeidsløyse for personar 16-74 år. Sesongjusterte tal, tremånadars glidande gjennomsnitt. Absolutte tal i 1000 og arbeidslause i prosent av arbeidsstyrken.