Skatterekneskap, november 2015

Rogaland er det einaste fylket med reduksjon i dei totale skatteinnbetalingane eksklusiv petroleumsskattane. Kommunane i dette fylket hadde i gjennomsnitt 4,9 prosent lågare innbetalingar jamfør den same perioden i fjor. Dei andre fylka hadde ei auke i innbetalingane frå 2,6 prosent (Hordaland) til 10,7 prosent (Finnmark).

Lågare innbetalte skattar frå overskott til bedrifter i Stavanger

I Rogaland er det Stavanger som har reduserte innbetalingar av skattar eksklusiv petroleumsskattar. Skattane her er 14,5 prosent lågare enn i den same perioden i fjor. Dei andre kommunane i Rogaland hadde alle enten same nivå på skatteinnbetalingane eller høgare innbetalte skattar jamfør i fjor. Det er i hovudsak netto innbetalingar av skatt frå overskott i bedrifter som er blitt lågare i Stavanger. Dette skuldast både lågare skatteinnbetalingar jamfør i fjor og netto utbetalingar i samband med oppgjer for skattesakar tidlegare år.

Skattar frå petroleum ned frå 18 til 13 prosent av totale skattar

Ved utgangen av november 2015 var det innbetalt 790 milliardar kroner i skatt mot 815 milliardar kroner i den same perioden i fjor. Petroleumskattane hittil i år er 105 milliardar kroner og utgjer 13 prosent av totale skattar. I den same perioden i fjor var skattane frå petroleum 150 milliardar kroner som svarar til 18 prosent av totale skattar.