Registrerte arbeidsledige blant innvandrere (avsluttet i Statistisk sentralbyrå), 1. kvartal 2001

Innvandrarar frå Aust-Europa og Afrika hadde den største nedgangen med respektive 1,3 og 1,0 prosentpoeng, men framleis ligg den registrerte arbeidsløysa for innvandrarar frå Afrika høgast, med 13,4 prosent ved utgangen av februar 2001. Andre innvandrargrupper med relativt høg arbeidsløyse var dei frå Asia og Aust-Europa med respektive 9,9 og 9,6 prosent. Innvandrarar frå dei vestlege verdsregionane ligg berre nokre få desimalar høgare enn den registrerte arbeidsløysa for heile landet.

Ser vi på endringane blant menn og kvinner, finn vi den største nedgangen blant menn frå Aust-Europa med 1,5 prosentpoeng og blant kvinner frå Afrika som hadde ein nedgang i arbeidsløysa på 1,4 prosentpoeng.

I befolkninga totalt låg arbeidsløyseprosenten på 3,1 prosent for menn og 2,4 prosent for kvinner.

Blant førstegenerasjonsinnvandrarar var dei tilsvarande tala 8,3 og 6,1 prosent.

Størst nedgang for dei med butid fire til seks år

Det er blant dei med butid på mellom fire og seks år, som har det høgste nivået på arbeidsløysa, at vi finn den mest markerte nedgangen. Her gjekk arbeidsløysa ned frå 6,5 prosent i februar 2000 til 5,6 prosent i februar 2001 (i prosent av personar i alt, 16-74 år), ein nedgang på 0,9 prosentpoeng.

Det er i gruppene frå Aust-Europa og Afrika at nedgangen er størst, med respektive 1,2 og 1,0 prosentpoeng.

For dei med butid under fire år har det vore ein auke på 0,5 prosentpoeng, frå 3,9 til 4, 4 prosent. Dette kan tyde på at fleire nykomarar til landet melder seg tidlegare som arbeidssøkjarar.

Den fylkesvise utviklinga

Vest-Agder og Rogaland hadde den høgaste registrerte arbeidsløysa blant innvandrarane med respektive 6,8 og 6,5 prosent målt i forhold til befolkninga 16-74 år. (NB! Sidan vi her nyttar befolkninga som nemnar, vert prosentdelane noko lågare enn dei som byggjer på arbeidsstyrken.) Desse to fylka var òg blant dei få som hadde auke frå februar 2000 til februar 2001. Elles har det vore nedgang i dei fleste andre fylka.

Målt i prosent av befolkninga var arbeidsløysa på 2,0 prosent for alle busette og 4,6 prosent for alle førstegenerasjonsinnvandrarar.

På arbeidsmarknadstiltak

Talet for personar på ordinære arbeidsmarknadstiltak viser på landsbasis berre ein marginal auke frå 0,4 prosent i februar 2000 til 0,5 prosent i februar 2001. Blant førstegenerasjonsinnvandrarane har denne prosentdelen auka noko meir, frå 1,7 til 2,1 prosent. Ser vi på einskilde grupper, hadde innvandrarar frå Asia og Afrika den største auken, begge med 0,9 prosentpoeng.

Ved utgangen av februar 2001 var det 14 585 personar på ordinære arbeidsmarknadstiltak. Av desse var 4 645 førstegenerasjonsinnvandrarar, eit tal som utgjer nærare 32 prosent av alle deltakarane på arbeidsmarknadstiltak. Det er primært innvandrarar frå ikkje-vestlege land vi finn i denne deltakargruppa, med hovudvekt på Aust-Europa og Asia. Til saman utgjer dei om lag 75 prosent av deltakarar med innvandringsbakgrunn. I forhold til busette personar i alt, var det innvandrarar frå Afrika som hadde den høgaste deltakarprosenten med 3,6 prosent. Elles hadde innvandrarar frå Aust-Europa og Asia begge ein deltakardel på 3,1 prosent. Blant innvandrarar frå vestlege land er desse deltakarprosentane jamvel litt lågare enn dei vi finn i heile befolkninga. Desse skilnadene mellom dei vestlege og ikkje-vestlege innvandrargruppene ser ut til å vere eit stabilt trekk når det gjeld deltaking på arbeidsmarknadstiltak.

Nord-Trøndelag og Finnmark hadde dei høgaste deltakarprosentane for førstegenerasjonsinnvandrarar med respektive 3,9 og 3,6 prosent. Begge desse fylka hadde òg den høgaste prosentdelen deltakarar for alle busette, begge med 0,8 prosent.

Statistikken kjem ut fire gonger i året.

Tabeller:

• Tabell 1 Registrerte heilt arbeidslause i alderen 16-74 år, etter landbakgrunn og kjønn. Absolutte tal og i prosent av arbeidsstyrken. Utgangen av november 1999, februar 2000, november 2000 og februar 2001
• Tabell 2 Personar på ordinære arbeidsmarknadstiltak, etter landbakgrunn og kjønn. Absolutte tal og prosent av personar i alt 16-74 år. Utgangen av november 1999, februar 2000, november 2000 og februar 2001
• Tabell 3 Registrerte heilt arbeidslause og personar på ordinære arbeidsmarknadstiltak, etter landbakgrunn og talet på år busett i Noreg. I prosent av personar i alt 16-74 år. Utgangen av februar 2000 og 2001
• Tabell 4 Registrerte arbeidslause, etter landbakgrunn og bustadfylke. Absolutte tal og prosent av personar i alt 16-74 år. Utgangen av februar 2000
• Tabell 5 Registrerte arbeidslause, etter landbakgrunn og bustadfylke. Absolutte tal og prosent av personar i alt 16-74 år. Utgangen av februar 2001
• Tabell 6 Registrerte på ordinære arbeidsmarknadstiltak, etter landbakgrunn og bustadfylke. Absolutte tal og prosent av personar i alt 16-74 år. Utgangen av februar 2001