Kommunehelsetenesta, 2006

Kommunane si helsestasjons- og skolehelseteneste har fleire personellressursar enn nokon gong. Totalt var det 3 271 årsverk i tenesta i 2006. Nær to tusen av årsverka er helsesystrer, og auken i talet på helsesystrer har vore på bortimot 100 årsverk frå 2005 til 2006. Auken kan sjåast i samanheng med Opptrappingsplanen for psykisk helse. Samstundes held trenden med nedtrapping av lege- og fysioterapeutressursane i helsestasjons- og skolehelsetenesta fram. I 2006 var det her 430 årsverk av legar og fysioterapeutar til saman.

Fleire lege- og fysioterapiårsverk

Innanfor kommunehelsetenesta totalt held auken av legeårsverk fram. Frå 2005 til 2006 kan òg fysioterapeutar visa til same vekst.

I 2006 var det 4 281 legeårsverk i kommunane, ein auke på rundt 60 årsverk samanlikna med året før. Ser vi på utviklinga tilbake i tid, har kommunane nær 1 000 fleire legar i 2006 enn dei hadde for 10 år sidan. Tre av fire legeårsverk i kommunehelsetenesta gjeld legar som har inngått driftsavtaler med kommunen. Resterande er fastlønte legar, turnuslegar og legar utan avtale.

Det var 4 205 årsverk av fysioterapeutar i 2006, 1,4 prosent fleire enn i 2005. Gjennomsnittleg utgjer fysioterapeutane 9 årsverk per 10 000 innbyggarar på landsbasis, men dette varierer noko med sentralitet. Dei mest sentrale kommunane har ei lågare dekning enn mindre sentrale kommunar.

Tabeller:

• Tabell 1 årsverk av ulike yrkesgrupper i kommunehelsetenesta. årsverk per 10 000 innbyggjarar. Sentralitet. 1994-2006
• Tabell 2 årsverk av ulike yrkesgrupper i kommunehelsetenesta. Sentralitet. 1994-2006
• Tabell 3 årsverk av legar med ulike avtaleformer i kommunehelsetenesta. Sentralitet. 1994-2006 (Korrigert 19. juni 2007 kl. 1200)
• Tabell 4 årsverk av fysioterapeutar med ulike avtaleformer i kommunehelsetenesta. Sentralitet. 1994-2006
• Tabell 5 årsverk i helsestasjons- og skolehelsetenesta. 1994-2006
• Tabell 6 Legeårsverk, etter virkeområde. 1994-2006
• Tabell 7 Fysioterapeutårsverk,etter virkeområde. 1994-2006