Kva er Noregs mål for å redusere utsleppa i 2030 og 2050?

Vi skal først sjå på kva statsministrane Erna Solberg og Jonas Gahr Støre har sagt om Noregs mål for å redusere klimagassar i 2030 og 2050, Solberg var statsminister i Noreg frå oktober 2013 til oktober 2021. Då tok Støre over statsministerjobben.

I talen sin i FNs hovudforsamling den 23. september 2021 sa statsminister Erna Solberg dette:

– We are doing our part. Norway's new target is to cut emissions by at least 50 % – and towards 55 % – by 2030 (regjeringen.no).

Dette målet for 2030 er eit mål som Noreg har sett i avtalen som kjem etter Kyotoavtalen. Denne avtalen heiter Parisavtalen. I Parisavtalen blir utsleppsmålet framleis sett i forhold til 1990. Altså seier Erna Solberg at målet for Noreg er at utsleppa av klimagassar i 2030 skal vere 50−55 prosent lågare enn i 1990.  Det er også eit mål for norsk klimapolitikk at klimagassutsleppa skal kuttast med 90−95 prosent i 2050 (regjeringen.no, 2021).

Regjeringa Støre endra målet for 2030 den 3. november 2022, til minst 55 prosent. Statsminister Jonas Gahr Støre sa dette då det nye målet blei presentert:

– Jeg er glad for å kunne annonsere at Norge forsterker sitt mål til minst 55 prosent. Dette sender et sterkt signal til andre land, og vi håper flere vil forsterke sine mål, sier statsminister Jonas Gahr Støre (regjeringen.no, 2022).

Noreg fekk ei klimalov i 2017, og med endringar som har kome etterpå så er måla for 2030 og 2050 talfesta. Lova seier også at regjeringa må sørgje for at måla vert vurderte kvart femte år for å sjå om dei bidreg nok til at Noreg vil vere eit lågutsleppssamfunn i 2050:

I paragrafane 3 og 4 i klimaloven står det blant anna at:

• «Målet skal være at klimagassutslippene i 2030 reduseres med minst 55 prosent fra utslippsnivået i referanseåret 1990.»
• «Målet skal være at klimagassutslippene i 2050 reduseres i størrelsesorden 90 til 95 prosent fra utslippsnivået i referanseåret 1990.»
• «For å fremme omstilling til et lavutslippssamfunn, jf. § 4, skal regjeringen i 2020 og deretter hvert femte år legge fram for Stortinget oppdaterte klimamål.»

Regjeringa bad i oktober 2024 om innspel til reviderte klimamål for 2050. Det er eit krav i klimaloven at regjeringa skal legge fram slik mål i 2025 og deretter kvart femte år. Klima- og miljøminister Tore O. Sandvik seier dette i pressemeldinga der regjeringa ber om innspel til nye klimamål for 2050:

«Norge skal være et lavutslippssamfunn i 2050. Ved å sette oss mål på veien skaper vi forutsigbarhet som gjør at næringsliv og virksomheter kan bidra til at vi skaper jobber og kutter utslipp. Regjeringen ønsker en åpen og offentlig debatt om hva dette målet bør være,»

Ved å løyse oppgåve D kan du finne ut kva Noregs utslepp skal vere i 2030 og 2050 med utsleppsmåla.